საქართველოს შესახებ
საქართველო
კეთილი იყოს თქვენი მობრძანება საქართველოში! საქართველო სამხრეთ კავკასიაში მდებარე პატარა და თვალწარმტაცი ქვეყანაა, უძველესი კულტურული და ისტორიული მემკვიდრეობით. მისი ისტორია 2500 წელზე მეტს ითვლის.
საქართველოს ესაზღვრება ჩრდილოეთიდან რუსეთი, სამხრეთიდან თურქეთი და სომხეთი და სამხრეთ-აღმოსავლეთიდან აზერბაიჯანი. ტრანსკონტინენტური ქვეყანა სამხრეთაღმოსავლეთ ევროპისა და დასავლეთ აზიის გასაყარზე მდებარეობს, თუმცა სოციოპოლიტიკურად და კულტურულად ევროპის ნაწილია.
საქართველო კულტურის, რელიგიის, თვალწარმტაცი ბუნებისა და უძველესი ისტორიის თვალსაზრისით უნიკალური ქვეყანაა. ამ პატარა ტერიტორიაზე საოცრადაა შერწყმული ყველაზე კონტრასტული, რაც შეიძლება ადამიანმა წარმოიდგინოს - მარადიული თოვლით დაფარული მწვერვალები თუ სუბტროპიკული სანაპიროები, უდაბნო თუ ხშირფოთლოვანი ტყე, თანამედროვე ქალაქები თუ უძველესი სოფლები.
საქართველო მდებარეობს სამხრეთ კავკასიაში, შავი და კასპიის ზღვებს შორის. იგი დაახლოებით სამი ათას ხუთასი წლის ისტორიის მქონე ქვეყანაა და ორი ათასი წელია, რაც აქ ქრისტიანობაა გავრცელებული.
უძველესი დროიდან საქართველოს ღვინის სამშობლოდ მოიხსენიებენ. ქვეყანას ღვინის დამზადების ძალიან დიდი ტრადიცია აქვს. არქეოლოგები და ისტორიკოსები ფლობენ ისტორიულ მასალას 7000-წლოვანი ქართული ყურძნის ჯიშებისა და კიდევ უფრო ძველი ღვინის ჭურჭლის შესახებ. მეცნიერთა მტკიცებით, ყურძნის უძველესი ჯიშები სწორედ საქართველოშია აღმოჩენილი.
საქართველოს მოსახლეობა შეადგენს დაახლოებით 5 მილიონს. ქვეყნის ოფიციალური ენა ქართულია. ეს არის ერთადერთი ენა იბერიულ-კავკასიურ ენათა ოჯახში, რომელსაც უძველესი დამწერლობა და საკუთარი ანბანი აქვს. ქართული ანბანი მსოფლიოში არსებული 14-დან ერთ-ერთია. მისი წარმოშობის რამდენიმე ვერსია არსებობს, თუმცა ყველაზე გავრცელებული მოსაზრებით, იგი წინარექრისტიანულ ეპოქაშია შექმნილი.
თბილისი საქართველოს დედაქალაქი მე-5 საუკუნიდანაა. ქალაქის დაარსებას საინტერესო ისტორია აქვს. ლეგენდის მიხედვით, თბილისის მშენებლობას მეფე ვახტანგ გორგასლის დროს ჩაეყარა საფუძველი. ქალაქი თბილი მინერალური წყლის საბადოებზეა აშენებული და აქედან მომდინარეობს მისი სახელწოდებაც. საქართველოს დედაქალაქი გახდა ერთ-ერთი მნიშვნელოვანი ქალაქი მთელ კავკასიაში. თბილისის ღირსშესანიშნაობებიდან აღსანიშნავია მთაწმინდა, მეტეხის ტაძარი, რომელიც კლდის წვერზე დგას და მდინარე მტკვარს გადაჰყურებს, ნარიყალა - ციხე-გალავნის ნაშთი, სიონის ტაძარი და სხვა მრავალი.
საქართველოს უმშვენიერესი არქიტექტურა, ძირითადად, წარმოდგენილია უძველესი ტაძრებით, ეკლესიებითა და ციხესიმაგრეებით, რომლებიც, მიუხედავად ისტორიული ქარტეხილებისა, ქვეყანაში მრავლადაა შემორჩენილი. ფორმების სიმარტივე, ეფექტური დიზაინი, ჰარმონიული პროპორციები, უმშვენიერესი ორნამენტები და იდეალური შერწყმა გარემომცველ ბუნებასთან ქართული არქიტექტურის უდიდესი ღირსებაა. ეკლესიების ძირითადი ტიპი არის ბაზილიკა. ქართული ბაზილიკის უძველესი ნიმუშები მე-4 მე-6 საუკუნეებით თარიღდება.
რაც მთავარია, ქვეყანას საამაყო და უნიკალური პოლიფონიური სიმღერების ტრადიცია აქვს. მრავალხმიანი ქართული ხალხური სიმღერები და საგალობლები მსოფლიოს ცნობილი პროფესიონალების ყურადღებას იპყრობენ. საქართველო გამოირჩევა სპეციფიკური სამზარეულოთი და სახელგანთქმული სტუმართმოყვარეობით. ქართული სტუმართმოყვარებით მოხიბლულ უცხოელ ტურისტებს ხშირ შემთხვევაში სწორედ ამის გამო უჩნდებათ მისი ხელახალი მონახულების სურვილი.
საქართველო ცნობილია მრავალფეროვანი პეიზაჟებით. მოგზაურებს ქვეყნის ღირსშესანიშნაობების დასათვალიერებლად ფართო არჩევანი ეძლევათ. მათ შეუძლიათ იხილონ ისტორიული ძეგლები, უნიკალური არქიტექტურა, ხელოვნების განუმეორებელი ნიმუშები, უძველესი ტრადიციები, კულტურა, მომხიბვლელი კავკასიის მთათა სისტემა, უნიკალური კურორტები და ეროვნული პარკები. ასევე შესაძლებლობა ექნებათ, იგემონ უგემრიელესი ქართული კერძები და ღვინო, გაიცნონ მეგობრული და სტუმართმოყვარე ხალხი.
ფართობი: 69700 კვადრატული კილომეტრი მოსახლეობა: საქართველოს მოსახლეობა 1990 წლის ოფიციალური აღწერის მონაცემებით იყო 5 493 000 ადამიანი. დღესდღეობით არაოფიციალური მონაცემებით საქართველოს მოსახლეობა 4 500 000-ზე ნაკლებია. საქართველო მრავალეროვანი ქვეყანაა, ძირითადი მოსახლეობა არიან ქართველები (70%). საქართველს სახელმწიფო რელიგიაა მართლმადიდებლობა, თუმცა აქ ცხოვრობენ მსოფლიოს თითქმის ყველა რელიგიური კონფესიის მიმდევარი ადამიანები. დედაქალაქი: თბილისი. (მოსახლეობა 1990 წ. 1 480 000 კაცი). ქვეყნის კლიმატი კონტინენტურ-სუბტროპიკულია, არის თითქმის ყველანაირი ბუნებრივი ლანდშაფტი. საშუალო ტემპერატურა ზაფხულში +24 გრადუსია, ზმთარში +5 გარდუსი. ნალექი ზომიერია (უფრო მეტი დას. საქართველოში)
დიდი მდინარეები: სიგრძე კოლმეტრებში
მტკვარი 1515
თერგი 591
ჭოროხი 438
ალაზანი 390
იორი 357
რიონი 327
ენგური 221
ხრამი 220
ცხენისწყალი 183
ყვირილა 155
სუფსა 117
ლიახვი 115
ბზიფი 114
არაგვი 112
კოდორი 110
აჭარისწყალი 90
ტბები: საქართველოს ყველაზე დიდი ტბაა ფარავანი. ყველაზე ღრმა - ამტყელი (122მ.). საქართველოს ყველაზე მაღალი მთის მწვერვალია შხარა 5068 მ. ზღვის დონიდან. ყველაზე მაღალი უღელტეხილია ნაკრა (3203 მ.)
დღესასწაულები:
1 იანვარი ახალი წელი
7 იანვარი მართლმადიდებლური ქრისტესშობა
19 იანვარი ნათლისღება
3 მარტი დედის დღე
9 აპრილი ხსოვნის დღე
5-6 მაისი მართლმადიდებლური აღდგომა
26 მაისი დამოუკიდებლობის დღე
24 აგვისტო კონსტიტუციის დღე
28 აგვისტო მარიამობა
14 ოქტომბერი სვეტიცხოვლობა
23 ნოემბერი გიორგობა
